Publication Details
Abstract
Кириш: Чаноқ-сон бўғими артрози (коксартроз) таянч-ҳаракат тизимининг кенг тарқалган дегенератив-дистрофик касаллиги бўлиб, унинг эрта босқичларида клиник ва рентгенологик белгилар кам ифодаланган бўлади. Шу сабабли, касалликни дастлабки босқичда аниқлашда юқори аниқликка эга бўлган магнит-резонанс томография (МРТ) усули муҳим аҳамият касб этади. Мақсад: Коксартрознинг дастлабки босқичларида МРТ орқали аниқланадиган эрта дегенератив ўзгаришларни ўрганиш ва унинг диагностик имкониятларини баҳолаш. Материал ва усуллар: Тадқиқотда коксартрознинг бошланғич босқичига гумон қилинган 120 нафар бемор иштирок этди. МРТ текшируви стандарт протокол асосида Т1, Т2 ва ёғ сигналини сўндириш режимларида ўтказилди. Натижалар: Беморларнинг 69,5 фоизида эрта дегенератив ўзгаришлар аниқланди. Энг кўп учрайдиган ўзгаришлар сифатида бўғим тоғайи сигналининг бирхил эмаслиги (58,7%), тоғай юзасидаги микронотекисликлар (52,1%) ва тоғай ости суяк қисмида трабекуляр қайта қурилиш белгилари (47,8%) қайд этилди. Шунингдек, суяк кўмигидаги локал сигнал ошиши муҳим маркер сифатида баҳоланди. Хулоса: МРТ коксартрознинг дастлабки босқичларини аниқлашда юқори сезгирликка эга бўлган усул бўлиб, тоғай тўқимаси ва тоғай ости суяк қисмидаги минимал ўзгаришларни аниқлаш орқали эрта ташхис қўйиш имконини беради.